Kári sigraði í Stóru upplestrarkeppninni á Reykhólum

Það er mikil ánægja að segja frá því að keppandinn okkar hann Kári sigraði í Stóru upplestrarkeppninni sem var haldin á Reykhólum í gær. Sex keppendur voru frá Hólmavík, Reykhólum, Drangsnesi og Árneshreppi.  Í öðru sæti varð Aron Viðar Kristjánsson frá Reykhólaskóla og í þriðja sæti Daníel Freyr Newton frá Grunnskólanum á Hólmavík. Hvatningarverðlaun fékk Brianna Jewel Johnson frá Grunnskólanum á Hólmavík. 

Keppendur lásu kafla úr bókinni Ertu Guð, afi? eftir Þorgrím Þráinsson, ljóð eftir skáldkonuna Guðfinnu Þorsteinsdóttur sem tók sér skáldanafnið Erla og svo fóru þau með eitt ljóð að eigin vali. Kári valdi að fara með ljóðið Undur eftir Vilborgu Dagbjartssdóttur.

Dómarar í keppninni voru þau Baldur Sigurðsson frá Röddum, Guðjón Dalkvist á Reykhólum og sr. Elína Hrund Kristjánsdóttir sóknarprestur á Reykhólum.

Þær Karen Ösp Haraldsdóttir frá Grunnskólanum á Drangsnesi, sigurvegari frá í fyrra, og Aðalbjörg Egilsdóttir frá Reykhólaskóla, sem varð þá í öðru sæti, voru krökkunum til aðstoðar og kynntu höfunda keppninnar. 

Skemmtiatriðin voru í boði nemenda Reyhólaskóla sem sýndu auglýsingamyndband um vörur tengdar Reykhólum og svo flutti Sólrún Ósk Pálsdóttir lagið  You can read all about it í eigin útsetningu. 

Þetta var frábær keppni og óskum við Reykhólaskóla til hamingju með glæsilega hátíð og auðvitað keppendum öllum fyrir framúrskarandi árangur!