Fegurðarsamkeppni fjallanna í Trékyllisvík

Öll fjöllin í Trékyllisvík eru falleg, um það erum við alveg sammála hér í Finnbogastaðaskóla. En við höfum ákveðið, til gamans, að gera skoðanakönnun meðal lesenda um uppáhaldsfjallið þeirra í Trékyllisvík.

Sex fjöll keppa um sæmdarheitið fallegasta fjallið í Trékyllisvík. Þetta eru Reykjaneshyrna, Örkin, Finnbogastaðafjall, Árnestindur, Hlíðarhúsafjall og Krossnesfjall.

Við ætlum að birta myndir og upplýsingar um öll fjöllin og byrjum á Reykjaneshyrnu.

Reykjaneshyrna gengur hnarreist í sjó fram og er 316 metra há. Í Reykjaneshyrnu er stór hellir sem heitir Þórðarhellir. Sagan segir að þar hafi flóttamenn undan réttvísinni leitað skjóls í gamla daga.

Júlíana hefur skoðað Þórðarhelli og segir að þar sé alveg hægt að búa, þó þar sé örugglega kalt á veturna.

Ljósmyndin af Reykjaneshyrnu var tekin fyrir mörgum árum. Á myndinni eru Hrafn Jökulsson og Kolbrá litla systir hans en Hrafn var smalapiltur í Stóru-Ávík þegar hann var lítill. Með þeim er hundurinn Kátur, sem Hrafn segir að hafi verið einn besti vinur hans í heiminum.

Á næstu dögum birtum við myndir og upplýsingar um aðra keppendur í fegurðarsamkeppni fjallanna í Trékyllisvík

Athugasemdir

[Ingibjörg Ágústsdóttir, 14.11.2007 kl. 22:31]

Það er mjög góð hugmynd hjá ykkur að hafa svona kosningu, stelpur! Ég geri ráð fyrir að þið komið með kynningu og mynd af öllum fjöllunum áður en við megum kjósa?

Haldið áfram að skrifa svona skemmtilegar fréttir - það er SVO GAMAN að fylgjast með ykkur.

Og takk fyrir síðast, Júlíana mín. Davíð Ingi saknar þín.

Kær kveðja, Ingibjörg