Litlu jólin

Í gær voru litlu jólin haldin hátíðleg hérna í skólanum. Elísa las jólasöguna, Litla stúlkan með eldspýturnar eftir H. C. Andersen, svo fórum við að borða. Við fengum hangikjöt með uppstúf og kartöflum ásamt allskonar gómsætu meðlæti og ekki má gleyma laufabrauðinu. Í eftirmat var möndlu ísinn. Þórey fékk möndluna þetta árið og fékk að gjöf litla fuglastyttu. Eftir matinn var komið að pökkunum. Við völdum okkur öll pakka og opnuðum þá. Ég fékk lukt, Kári fékk kerti og spil, Þórey fékk bolla til að mála, Alma fékk þvottaklemmur með fígúrum á og gúmmí geimverur í teygjubyssu, Aníta fékk bolla í kókó-puffs pakka, Anna fékk föndurskæri, Elísa fékk vasaljós og Hrefna fékk hjólaljós. Núna getur Hrefna hjólað útum allt og séð fram fyrir sig ;) Þegar við vorum búin að opna pakkana var lesin önnur jólasaga, Kona jólasveinsins. Svo fórum við útí samkomuhús og litlu jólin voru haldin hátíðleg. Þessi dagur var nú bara mjög vel heppnaður og allir fóru glaðir heim með eplin sín, pakkana og jólakortin sín. 

Kveðja Ásta Þorbjörg