Finnbogastaðaskóli

Við gerum gott úr vor-snjó í Finnbogastaðaskóla

Í gamla daga, þegar ekki voru frystiskápar á heimilum, bjó fólk til rjómaís í snjósköflum. Við hér í Finnbogastaðaskóla ákváðum að prófa þessa gömlu ísgerðartækni (fyrst það fór að snjóa aftur).

Þetta heppnaðist ljómandi vel. Flestir eru saddir og fróðari um varmaflutning, áhrif NaCl á ísvatn og ískristallamyndun.

Uppskrift að fimmtudags ís

250 ml. ab mjólk (súrmjólk, jógúrt)

250 ml. mjólk

3 þroskaðir bananar

2 msk kakóduft (nesquik)

1 msk sykur (má sleppa)

(hægt að nota lífrænt kakó og agave sýróp)

Allt sett í blandara

Einn bolli af ísblöndu er settur í hvern poka, og það tekur 10-15 mín að framleiða ísinn.

Þetta er ferskur og góður jógúrt ís, en þeir sem vilja síður jógúrtbragð
geta notað venjulega mjólk eða rjóma í staðinn.

Það er líka alveg tilvalið að nota ávaxtasafa og/eða maukaða ávexti og búa til krap.

Vorkveðja frá okkur til þín !

Takk Roland!

Með póstinum barst þessi dásamlegi pakki frá vini okkar honum Roland. Súkkulaðið flæddi uppúr ásamt þessu fallega bréfi til okkar. Við skiptum innihaldinu bróðurlega á milli okkar og lofum Roland að passa að bursta tennurnar vel og vandlega.

Hér eru Þórey og Aníta búnar að stilla sér upp með nammipokana sína Wizard

Við lögum skólalóðina

Foreldrar komu í skólann í morgun og við hjálpuðumst öll að við að laga skólalóðina okkar. Við settum nýja þverspýtu fyrir rólurnar og mottur undir. Allir hjálpuðust að og voru svakalega duglegir. Hér eru nokkrar myndir frá deginum.

Kærar þakkir fyrir daginn!

Fjörustærðfræði

Við í yngri deild nutum veðurblíðunnar í botn þegar við fórum í fjöruna fyrir neðan skólann og æfðum okkur í stærðfræði. Auðvitað fundum við líka ýmsar gersemar eins og t.d. brýni, bein, skeljar, plastdót, fallega steina og kuðunga. En myndirnar tala sínu máli.

Páskabingó

Laugardaginn fyrir páska stóð foreldrafélag Finnbogastaðaskóla fyrir bingói í félagsheimilinu. Það var góð mæting enda frábærir vinningar í boði t.d fullt af páskaeggjum, gjafabréf frá Madonnu hárgreiðslustofu, úttekt í KSH, dvd frá Skjánum og flugfar frá Örnum. Allir skemmtu sér mjög vel og hér eru tvær myndir frá bingóinu.

Páskar

Halló kæru vinir!

Núna erum við alveg að fara í páskaleyfi og erum því búin að læra mikið um páskana undanfarna daga. Við í yngri deild bjuggum til ýmislegt páskadót t.d. hana úr eggjabakka, páskabók um síðustu daga Jesú og páskakanínur. Þær bjuggum við til í smíði og máluðum svo og saumuðum á þær föt. Hér sjáið þið mynd af kanínunum okkar. Þær heita Kata, Atlas og Doppa.

Við viljum svo minna ykkur öll á páskabingó foreldrafélagsins sem verður laugardaginn 30. mars.

Gleðilega páska!

Málsháttamyndir

Í skólanum okkar eru sannkallaðir listamenn að störfum. Í dag fengum við það verkefni að teikna málshætti en það er einmitt skemmtilegur páskasiður að lesa málshætti t.d. sem við fáum í páskaeggjum. Krakkarnir fengu einn málshátt hver til að teikna. Myndirnar ætlum við að hengja upp hérna í skólanum.

Skólaferðalag á Drangsnes

Við fórum í frábært skólaferðalag í síðustu viku og hittum nemendur á Drangsnesi okkar næsta sveitarfélagi. Við fórum á miðvikudagsmorgni og vorum komin í skólann um ellefu. Nemendur og kennarar tóku vel á móti okkur og við byrjuðum á að kynnast aðeins og fengum okkur svo öll hádegisverð. Við fórum svo út og fórum í nokkra hópeflisleiki og kynntumst aðeins hvert öðru.

Seinnipartinn fóru allir í sundlaugina og þar var mikið leikið og sprellað. Að sjálfsögðu voru allir orðinir vel svangir eftir sundið svo við fórum á Malarkaffi þar sem vel var tekið á móti öllum hópnum og við fengum svaka fína hamborgara.

Um köldið var svo haldið diskó og allir skemmtu sér þrusu vel. Við vorum svo heppin að fá að gista í skólanum svo það fór mjög vel um okkur. Morguninn eftir fórum við í tíma með krökkunum og fengum kynnast því sem þau eru að fást við á daginn.

Eftir að hafa kvatt þessa skemmtilegu krakka og kennara tókum við saman dótið okkar og héldum í fiskverkunina Drang. Þar var hann Óskar en hann tók vel á móti okkur og sýndi okkur allar fínu vélarnar og við fengum að sjá hvaða leið fiskurinn fer í gegnum fiskverkunina. Að lokum fengu allir kakóbolla, miða með nafninu sínu og harðfiskpoka.

Við þökkum öllu þessu frábæra fólki kærlega fyrir okkur!

Útileikfimi í febrúar

Einn góðviðrisdaginn í febrúar, nánar tiltekið 11. febrúar, var veðrið of gott til að hafa leikfimitímann inni í félagsheimilinu. Því brugðum við okkur út á tún og gerðum nokkrar æfingar og fórum í skemmtilega leiki. Þetta var fyrsti útileikfimitími ársins, enda rétt um tvær vikur þarna síðan sólin byrjaði aftur að

skína á okkur í Trékyllisvíkinni. Enda sést það á myndunum að þrátt fyrir að ná að skína yfir fjöllin voru skuggarnir í lengra lagi og ekki annað hægt en að bregða á leik.

Öskudagur

Að venju var mjög gaman hjá okkur á öskudaginn. Við gerðum okkur klár í skólanum og fórum svo á bæina í víkinni og sungum fyrir nammi. Svo var flott öskudagsskemmtun í félagsheimilinu þar sem ungir sem gamlir skemmtu sér konunglega!

Hér er ein mynd af nemendum og starfsfólki

kassinn flotti